Thursday, 8 September 2016

போட்டித் தேர்வு திருக்குறள்கள் :

Standard
வணக்கம் நண்பர்களே,

எத்தனையோ வாழ்க்கை முறைகள் குறித்து குறள்களை எழுதியுள்ள நம் வள்ளுவர் "போட்டித் தேர்வு" குறித்து ஒரு அதிகாரம் எழுதி இருந்தால் எப்படி இருக்கும் என்று என் மனதில் தோன்றிய கற்பனையின் விளைவுதான் இது.

அதிகாரத்தின் பெயர்: போட்டித் தேர்வு
குறள்கள்: 10
எழுதியவர்: ஐயன் வழி வந்த "அஜி"


குறள்: 1.
---------
கடலளவு உள்ளது பாடம் அதனைக்
கடுகளவு மாற்றுவது ஞானம்

பொருள்: போட்டித் தேர்வின் பாடத் திட்டம் கடலளவு பெரியதாக இருப்பினும் அதனை உங்கள் அறிவால் கடுகளவு சிறியதாக மாற்ற முடியும்.

குறள்: 2.
---------

மொழிப்பாடம் விடச் செய்யின் வெற்றியின்
வழித்தடம் கெடச் செயும்.

பொருள்: மொழிப் பாடமே வெற்றியின் அடிப்படை, அதனை விட்டவர் வெற்றி சரியான பாதையில் இருந்து மாறிப் போகும்.

குறள்: 3.
---------

திருப்புதல் தருமே நன்மை அதனை
மறுப்பதற் கெவரு மிலர்

பொருள்: என்னதான் நன்கு படித்தாலும், திருப்புதலே நினைவு திறனை மேம்படுத்த வழி, இதனை யாரும் மறுக்க மாட்டார்கள்.

குறள்: 4.
---------

முயற்சியின் முடிவே வெற்றி எந்த
இகழ்ச்சியும் பொறுத்து விடல்

பொருள்: எந்த ஒரு வெற்றியும் ஒரு முயற்சியின் முடிவில் தான் கிடைக்கும், முயற்சிக்கும் - வெற்றிக்கும் இடைப்பட்ட நேரத்தில் பிறரால் வரும் இகழ்ச்சிகளை பொறுத்துக் கொள்ள வேண்டும் என்று ஆசிரியர் "அஜி" கூறுகிறார்.

குறள்: 5.
---------

தலைகுனிந்து படிப்போரின் வாழ்க்கை பின்னாளில்
தலைநிமிர்ந்து தனித்து நிற்கும்

பொருள்: இன்று தலை குனிந்து நீண்ட நேரம் படிப்போரின் வாழ்க்கை, நாளை வெற்றி பெற்று அரசு வேலைக்குச் செல்லும் பொழுது சமுதாயத்தில் உங்களை தலை நிமிர்ந்து தனித்து நிற்கச் செய்யும்.

குறள்: 6.
---------

தோல்விதருமே படிப்பினை அத்தோல்வியை ஞானத்தின்
வேள்வியில் எரித்து விடு

பொருள்: தொடர்ந்து வரும் தோல்வியின் மூலம் அதற்க்கு காரணமான தவறுகளை கண்டறிந்து திருத்திக் கொள்ள வேண்டும். அவ்வாறு திட்டமிட்டு செயல் பட்டால் அந்த தோல்விகளை அறிவுத் தீயில் எரித்து விடலாம்.

குறள்: 7
--------

ஊக்கமும் முயற்சியும் இல்லையெனில் ஏக்கமும்
இகழ்ச்சியும் தொடர்ந்து வரும்

பொருள்: போட்டித் தேர்விற்கு சுய ஊக்கமும், முயற்சியும் முக்கிய தேவை. அவ்வாறு இல்லாமல் வெறும் பெயருக்கு படித்தால், தோல்வியும், அதன் மூலம் ஏளனமும் தொடர்ந்து வரும் என்று இக் குறட்பாவின் மூலம் ஆசிரியர் "அஜி" அடித்துச் சொல்கிறார்.

குறள் 8:
--------

மனம்கொண்டு படிக்காதான் வெற்றி என்றும்
பிணம்கண்ட உயிருக்குச் சமம்

பொருள்: ஒரு பிணமானது தன்னிடம் இருந்து பிரிந்த உயிரை தனது அருகில் கண்டாலும் மீண்டும் உயிர் பெற முடியாது. அது போல முழு மனதுடன் தேர்விற்குப் படிக்காதவர்களுக்கு வெற்றி அருகில் இருந்தாலும் அதனை அடைய முடியாது என்று "ஏகதேச உருவக அணியில்" ஆசிரியர் விளக்குகிறார்.

குறள்: 9
--------

சோர்வினை நீக்கி தொடர்ந்து செயின்
தேர்வினை வென்று தரும்

பொருள்: சோர்வினை புறம் தள்ளி தொடர்ந்து படிப்பவர்கள் போட்டித் தேர்வினை எளிதாக வென்று வரலாம்.

குறள்: 10
----------

கற்றவரெல்லாம் வேலையில் சேரின் மற்றவர்க்கும்
வழியைக் காட்டி விடுக

பொருள்: போட்டித் தேர்வில் வெற்றி பெற்று வேலையில் சேர்ந்தவர்கள் அப்படியே இருந்து விடாமல், தங்களால் இயன்ற வரை முயற்சியில் உள்ள மற்றவர்களுக்கும் தங்களது அறிவுரைகள் மற்றும் வழி காட்டுதல்களை தொடர வேண்டும். இக் குறட்பாவினை ஆசிரியர் "யாம் பெற்ற இன்பம், பெறுக இவ்வையகம்" என்ற திருமூலரின் கூற்றினை நினைவு படுத்துகிறார்.

நன்றி,

ஆக்கமும், சிந்தனையும்
ஐயன் வழி வந்த "அஜி"
சென்னை.

2 comments: